Gak Bakalan Mati
WARUNG Mpok Rojané milik Mpok Wati makin rame konsumen. Padahal sudah dua hari, Mpok Wati menghilangkan menu yang menggunakan daging sapi, termasuk daging sapi impor.
“Daripade saye kasih kokoh ame cici semur daging beku, mendingan saye bikinin semur tahu, tempe, kentang, ame permata bunda,” jelas Mpok Wati ketika Koh Aming dan Cici Cay bertanya pasal ilangnye menu semur daging ame kalio daging.
Koh Aming mesem. “Kite kagak bakalan mati nggak makan daging, Koh..,” sambung Mpok Wati. “Ngomong-ngomong Koh Aming ame Ci Cay mo makan di sini, kan?” sambung Mpok Wati.
Koh Aming dan Ci Cay mengangguk. Lantas duduk di meja pojokan yang rada sepi. Gak berape lama, nongol Bang Idrus sambil mesam-mesem, nyamperin Mpok Wati.
“Bang Idrus mo buka di sini?”
“Begitu deh.., masa’ Wati kagak paham sih?”
“Iye saye paham.. Makenye Bang Idrus jangan ngeduda mulu..”
“Du.. segitunye.. Gimane kagak mo ngeduda, kalo permata hati kagak paham-paham maksud abang.”
“Oo.. abang mo makan ame permate bunda juga? Emang rejeki Bang Idrus deh.. Ni hari, saye dapet jengkol cakep-cakep bener..”
“Yah.. permate hati ame permate bunda kan beda, Wat.”
“Baek deh.. sekarang Bang Idrus duduk aje ye.. ntar pesenan Bang Idrus saye anterin..”
Bang Idrus langsung duduk dekat Koh Aming dan Ci Cay. Baru duduk, Koh Aming ude buka omongan.
“Saye denger Bang Idrus penasehat Ketua RT – RW yang menolak Ahok, ye?” tanya Koh Aming.
“Bukan cuman Ketua RT – RW, Ming. Gue juga penasehat semue warge Betawi yang menolak Ahok jadi Gubernur DKI Jakarta.”
“Kalo gitu termasuk penasehat kita-kita dong?” tukas Ci Cay.
“Aming ame Cay kagak setuju Ahok jadi Gubernur? Kagak sale?”
“Kagak salah Bang,” jawab Koh Aming.
“Kenape?”
“Siapa sih yang mau milih pemimpin rasis dan fundamentalis?”
“Kagak salah nih kuping gue denger pernyataan lu, Ming?”
“Pasti kagak Bang. Gara-gara sikap Ahok yang begitu, kita jadi susah.., jadi curigain banyak orang. Padahal, sejak lahir di Bandengan lima puluh taon lalu, kagak begini nikh..” jawab Koh Aming.
“Bang Idrus kan tahu sendiri gimane dari dulu kite hidup damai samai aja..,” sambung Ci Cay.
Belum sempat Bang Idrus nimpalin, makanan yang mereka pesan datang dan langsung disajikan di meja.
“Kalo lu ude laper, makan deh duluan, Ming..”
“Gak Bang.. mendingan nunggu beduk supaya kita makan bareng,” jawab Koh Aming.
Tak berapa lama, bedug di langgar Kyai Benu terdengar, berbarengan dengan kumandang azan maghrib di televisi. Bang Idrus menikmati tajil dulu. Baru kemudian menyantap ketupat sayur, permata bunda, dan semur tahu.
Pengunjung warung Mpok Wati yang laen juga sigap menyantap masakan pesanan mereka masing-masing. Mpok Wati keliatan berbuka dengan tajil yang sama dengan yang dinikmati Bang Idrus : buah atep sirop markisa buatan Mak Lela.
Habis makan, Bang Idrus buru-buru pamit ke masjid, setelah membayar makanan yang dia pesan ke asisten Mpok Wati. Mpok Wati sendiri, masuk ke dalam rumah untuk salat maghrib.
Gak begitu lama dateng Bang Zul. Langsung duduk di depan Koh Aming dan Ci Cay.
“Bang Zul udah buka?” tanya Ci Cay.
“Ude.. barusan di masjid. Sekarang giliran makan..,” jawab Bang Zul sambil ngeliat Ci Cay.
“Bang Zul kemane aje?” tanya Koh Aming.
“Saye baru pulang dari Papua.. Begitu pulang dapet kabar warga Pademangan pade nolak kedatengan Ahok ke kampungnye...,” jelas Bang Zul.
“Saya dapet kabar juga begitu, Bang Zul. Itulah hadiah buat pemimpin yang kagak paham kalo dirinya pemimpin,” ujar Koh Aming. Bang Zul ngeliat muka Koh Aming yang serius.
“Koh Aming bener. Semue itu bisa jadi lantaran Ahok cuman ngedengerin omongan satu pihak aje. Die kagak ngelihat kenyataan hidup warga yang sesungguhnye. Termasuk yang sakit ati lantaran kampungnye digusur,” jelas Bang Zul.
Mpok Wati keluar dari rumahnya. Begitu liat Bang Zul, kontan nyamperin.
“Ketupat sayur ame permata bunda ye, Wat..”
“Yah bang Zul keduluan Bang Idrus deh. Permate Bunda ude abis bang..”
“Kalo gitu kasih semur tempe ame kentang deh. Sambel kacang jeruk limonye jangan lupa..”
“Baek bang..” tukas Mpok Wati, seraya bergegas memenuhi pesanan Bang Zul. Koh Aming dan Cici Cay pamit. Keduanye nyamperin Mpok Wati, bayar makanan yang ude disantap.
Konsumen yang lain juga melakukan hal yang sama. Mereka antre mo bayar. Mpok Wati meminta asistennya menyampaikan makanan pesanan Bang Zul.
Warung ude rada sepi. Mpok Wati duduk di depan Bang Zul.
“Wati denger kabar Ahok diusir warga Pademangan?”
“Denger Bang. Ude berape hari nikh orang makan sambil cerita macem-macem kejadian yang gak pernah kejadian, semenjadi jaman Walikota Sudiro. Menurut abang, gejala ape sebenernye?”
“Ini bukan gejale Wat. Ini fakta, kepemimpinan Ahok gak diterima ame sebagian warga kota Jakarta.”
“Ahok didukung pengembang, didukung partai-partai yang ngedukung pemerentahan Jokowi – JK, ame didukung anak-anak mude juga fakta kan?”
“Bener. Sebagian anak muda yang mati-matian ngumpulin KTP dengan menghalalkan segale care juga fakta, Wat.”
“Nah.. ntu die bang.. banyak konsumen ni warung yang semule ngedukung Ahok, belakangan hari justru nunjukin sikap yang laen..”
“Wati bener. Mustinye semue kenyataan ntu jadi bahan pemikiran Ketue-ketue partai. Kenyataannye kan kagak begitu.”
“Biarin aje Bang.. Ntar juga pade ngerasain akibatnye waktu Pemilu 2019 nanti.. Saye yakin.. Partai-partai pendukung Ahok bakal ngungsep tuh di Jakarta..”
“Boleh jadi begitu Wat.. tentu kalo Pemilu-nya bener-bener dijamin bersih. Pan Wati tahu sendiri, sekarang jaman politik transaksional.. Pemimpin-pemimpin partai pendukung Ahok kan lagi pade melayang ngebayangin jagoannye bakal jadi di Pilkada taon depan.”
“Jadi, menurut abang Ahok gak bakalan menang?”
“Kite liat aje deh.. Kalo resistensi warge, terutama warge Betawi bulet menolak Ahok.., paling nggak ade dua puluh persen suare kagak milih Ahok..”
Bang Zul membasahi tenggorokannya ame teh pait daon pandan sajian khas warung Mpok Rojane.
Keliatan keduenye serius ngomongin fakta yang terjadi. Gak berape lame, keliatan Bang Zul berdiri. Die buka dompet, terus bayar makanan yang baru aje disantapnye. Bang Zul pergi meninggalkan warung. Mpok Wati ngerapiin aneka masakan yang masih tersisa di tempatnye.
Lagi asik Mpok Wati beberes. Bang Idrus dateng lagi. Die pesan kupi jahe.. terus duduk di salah satu meja yang kosong. Mpok Wati melayani permintaan Bang Idrus. Lantas kelihatan pade saling lirik, sambil mesam mesem.. Malem tambah malem, dari kejauhan terdengar orang tadarus dari loudspeaker masjid.. |
