Salah Tampe
Yoyo dateng mindik-mindik. Duduk di bale pojokan pekarangan yang nempel di beranda warung. Kaya spion jaman dulu, Yoyo ngintip dari luar. Matenye Yoyo terkesiap, ketika tiba-tiba asisten Mpok Wati ngedeket, bersihin tu kaca pake kemoceng.
Yoyo dari badannye. Bediri terus pelan-pelan pergi lewat sela-sela puun Selasih yang ditanem bebaris dari deket bale ke deket puun mangga. Asisten Mpok Wati sekelebat ngeliat bayangan orang di balik puun Selasih. Bulu kuduknye sempet bediri.
Ngeliat asistennye bengong sambil pegang kemoceng, Mpok Wati ngedeketin.
“Lu kenape siang-siang bengong kayak anak kambing Bang Aang?” tanya Mpok Wati.
Sang asisten menggeleng sambil nerusin ngebersihin kaca.
“Bersihin kaca cepetan. Abis ntu buruan pegi ke rumah Kong Haji Lo’ot di Cipete, mumpung ketupat, sayur, dendeng ame ayam gorengnye masih panas. Barusan Cing Siti ude nelepon tuh,”ujar Mpok Wati.
“Emangnye Cing Siti kagak masa Mpok, sampe Kong Haji Lo’ot mesen makanan di warung kite?”
“Ude jangan banyak cingcong. Cing Siti masak ape kagak bukan urusan kite. Urusan kite ngelayanin pesenan,”jawab Mpok Wati.
Sang asisten buru-buru beberes.
Yoyo yang ngumpet di belakang puun Selasih langsung kabur.
Gak berape lama, sang asisten ude nangkring di atas motor, terus berangkat ke rumah Kong Haji Lo’ot di Cipete. Die papasan ame Bang Idrus yang keliatan buru-buru melangkah ke warung.
Di warung Mpok Wati keliatan lagi gembira. Mulutnye bersenandung lagu Seroja ciptaan Husein Bawafie yang pernah ngetop dinyanyiin P. Ramlee di jamannye.
“Mari menyusun.. Seroja bunga Seroja.. Hiasan sanggung remaja putri remaja.. Rupa yang elok dimanja jangan dimanja.. Pujalah ia.. oh.. sekedar saja..” senandung Mpok Wati.
Bang Idrus yang ude bediri di pintu warung langsung nyamber. “Mengapa kau bermenung.. oh.. adik berhati bingung.. Janganlah engkau percaya dengan asmara.. Sekarang bukan bermenung jangan bermenung.. Mari bersama oh adik memetik bunga..”
Mpok Wati kaget. Die langsung nengok ke arah pintu, ngeliat Bang Idrus yang lagi mesem.
“Eh.. Bang Idrus.., sendirian aje?”
“Ya sendirian dong.. Masa mo ngeliat pujaan hati rame-rame..” jawab Bang Idrus menggoda, sambil berjalan ke kursi tempat biasa die duduk.
“Bang Idrus bisa aje...”
“Wat.. ape menu istimewa ni hari?”
“Menu istimewa ni hari sate buntel ame laksa..”
“Bikinin deh.. pake ketupat aje ye..”
“Siap bang..”
Mpok Wati langsung meninggalkan Bang Idrus. Die gak tahu mata bang Idrus terus ngimpleng, sambil berdecak. Asmara terus membara di dalam diri Bang Idrus. Seketika die mikir, gimane musti buka omongan pasal di Jamal.
Belon abis Bang Idrus mikir, Mpok Wati ude nganterin makanan pesenannye.
“Makan deh bang.. Jangan mikir mulu. Kebanyakan mikir ntar meriang lagi..,” ujar Mpok Wati sambil duduk di depan Bang Idrus.
“Ngomong-ngomong Bang Zul, Kyai Pendi, Bang Aang, ame Bang Ashari pade ke mane?”
“Lagi pade habek tuh..”
“Habek kenape? Siape yang mao ngawinin pake habek segala?”
“Bukan ngawinin die die pade lagi nyiapin Gerbang Betawi.”
“Gerbang Betawi?”
“Iye..”
“Mo bangun gerbang di mane? Di Condet ape di Srengseng? Pan ude ade tuh gerbangnye. Kalo mao bangun gerbang Betawi tuh di Merdeka Selatan sono.., deket patung Bang Husni Thamrin..”
“Gerbang Betawi maksudnye bukan ntu, Wat..”
Mpok Wati tersentak. Die pandangin muka Bang Idrus yang lagi menikmati sate buntel ame ketupat laksa. Sirrrr.., darah Bang Idrus mengalir deras, saat mata Bang Idrus ketemu pandang dengan mata Mapok Wati.
“Jadi ape maksud Gerbang Betawi?”
“Gerakan Kebangkitan Betawi. Gerakan pemikiran dan aksi nyata kaum terdidik dan terampil Betawi buat berkontribusi lagi ame kemajuan Indonesia, kayak yang pernah dilakonin ame Bang Husni Thamrin..,”jelas Bang Idrus.
Mpok Wati antusias menyimak omongan Bang Idrus. “Kok saye kagak diundang sih Bang. Begini-gini juga saye lulusan Mesir, cuman lagi perey aje jadi ustadzah..,”samber Mpok Wati.
“Semue kaum terpelajar dan terampil Betawi yang ade di mane aje bakalan diundang buat gabung di Gerbang Betawi.. Ini kesempetan buat semuenye pade ngamalin ilmu ame keterampilan masing-masing,”lanjut Bang Idrus, bikin mata Mpok Wati tambah berbinar-binar.
Bang Idrus mikir. Kesempatan buat ngungkapin isi hati ude kebuka nikh. Sambil menyelesaikan potongan ketupat terakhir di piring, Bang Idrus ude mao bersiasat buka omongan.
“Wat.. ngomong-ngomonng... “ujar Bang Idrus.
Belon sempet Bang Idrus nerusin omongan, Mpok Wati ude ngejawab, lantaran menduga Bang Idrus mao nanya soal si Jamal.
“Nah.. pasti deh Bang Idrus mao nanya soal lamaran di Jamal ke saye kan?”ungkap Mpok Wati.
Bang terkesiap. “Bener nih omongan Yoyo.. kalak siak lagi gue,”gumam Bang Idrus di dalem hati.
“Jamal ngelamar Wati?”
“Iye.. Minggu kemaren tuh die dateng ke sini.., ngungkapin isi hatinye.. Tuh anak nekad Bang..”
“Terus jawaban Wati pegimane?”
“Saye bilang, saye bersedia nemenin die.. Kalo bukan saye yang nemenin siape lagi bang? Biarin die kagak punya ape-ape, tapi die berani nunjukin tekadnye.. terus berani ngelamar saye langsung.”
Darah Bang Idrus yang tadi mendesir kena lirikan Mpok Wati, langsung anyep. Pandangan mata bang Idrus keliatan sayu. Badannye lemes. Die kepengen buru-buru beringsut dari kursi, tapi Mpok Wati masih terus bicara.
Seketika seorang lelaki tinggi besar sambil mesem ngucapin salam.
“Assalamu’alaikum.. “ ucap lelaki itu.
“Wa’alaikum salam.. Eh.. Bang Margani...,”jawab Mpok Wati sambil nyamperin abang misannye, terus cium tangan.
Margani memandang ke arah Idrus dan berjalan ke situ.
“Eh.. ade Bang Idrus.. Makin hensem aje ente..”
“Begitu deh Bang.. Alhamdulillah,”jawab Bang Idrus.
“Abang mo makan ape?”
“Ntar aje Wat.. sarapan gue aje belon turun.. Bikinin teh anget.. Gulanye dikit aje.. “
“Iye Bang..”sahut Mpok Wati sambil bergegas pergi.
“Gerakan RT – RW gimane?”tanya Bang Margani ke Bang Idrus.
“Ude paket Bang.. Gerakan menolak Ahok ude melebar kaya aer banjir dari kampung ke kampung. Ade sih satu dua yang ngarepin duren jatoh..,”jawab bang Idrus.
“Yang kayak begituan gibang aje.. “tukas Bang Margani.
Seketika Wati ude ngedeket. Tangannye naro teh pesenan bang Margani di atas meja. Terus duduk di samping Bang Margani.
“Wat.. bener si Jamal ngelamar elu? Gimane tuh persiapannye?”
“Bener bang. Saye juga ude terima tuh lamarannya. Kemaren dulu saye ame Jamal ude motret segale.. Soal persiapan, ya gitu deh.. ngalir aje kayak aer..,”jawab Wati.
Bang Idrus tambah lemes denger omongan Wati. Die ude nganggep, hasrat hati meminang Wati, perempuan mandiri cantik rupa elok budi pinter otak yang bisa bikin duda mane aje klepak-kelepek, usai sudah..
“Ceritenye pegimane tuh si Jamal...?” tanya Bang Margani.
“Mulanye sih die kagak kepikiran mao nyalonin diri di Pilkada taun besok. Apelagi die pikir, banyak anak-anak Betawi yang sangat terpelajar dan terpelajar, sekaligus berpengalaman di pemerintahan dan lembaga pemerentah laen yang pantes jjadi gubernur ame wakil gubernur Jakarta.., kayak abang gitu..” ungkap Wati.
Ngedenger omongan Wati.., Bang Idrus terkesiap lagi. Die serius nyimak obrolan Bang Margani dan Mpok Wati.
“Tapi.. lantaran kagak ade atu juga dari mereka yang berani maju, di Jamal nekad. Die mao ngebuktiin, masih ade anak Betawi di Jakarta.. terus die ngelamar saye buat nemenin jadi wakilnye.. Saye terima aje.. Kan asyik tuh Mapok Wati ahli masak segale bisa jadi Wakil Gubernur...” ujar Wati tersenyum.
Bang Margani tersenyum. Bang Idrus ikutan tersenyum.
“Saye pikir Jamal ngelamar Wati jadi bininye...,”cletuk Bang Idrus.
Mpok Wati tertawa.. “Bang Idrus ade aje.. Salah tampe melulu.. Masak saye kawin ame lelaki yang pantes jadi mantu saye.. Kalo mao kawin lagi juga, paling saye pilih yang seumuran Bang Idrus..,”sambung Wati.
Omongan Wati membuat Bang Idrus gembira hatinya. |
(Longok Juga : Ngandelin Pertama Bunda)
