Gara Gara si Dempak
WARUNG Mpok Wati rame. Abis bubaran solat Jum’at, jamaah pade ‘nyerbu’ ke warung. Jambal roti ame ‘permate bunde’ alias jengkol gak ade sisenye. Langsung abis.
Di pojokan warung, di balik meja yang paling deket ame kipas angin, keliatan Bang Kimung lagi ngobrol ame Bang Mas’ud. Mukenye keliatan pade serius.
Di meja yang laen, keliatan Bang Suja ame sohib kentelnye, si Jumhur. Juga lagi ngobrol. Keliatannye serius juga.
Mpok Wati juga serius ngelayanin pelanggan yang pade lapar.
“Bang Kimung pegi ke mane waktu jamaah mesjid dateng ke rumah, mo ketemu Bang Kimung?”
“Saye ngeliat proyek di jalur ijo, tuh Bang.”
“Pan Bang Kimung tahu, kalo jamaáh dipimpin Kyai Pendi mao ketemu abang. Kayaknye abang sengaja ye, pegi..”
“Pertanyaan Bang Mas’ud ude masuk kategori ngededes tuh. Saya ke proyek karena emang ude dijadualin.”
“Tapi, berape lame sih kunjungan ke proyek. Pastinye Bang Kimung sengaja ngehindar ye. Masak segitunye sih?”
“Gue ude tahu, Mas’ud. Yang mao disampein ame jamaah masjid yang dipimpin Kyai Pendi juga saye ude tahu. Sual kacung gue, si Dempak, yang dianggep ngehina Kyai Pendi kan?”
“Nah.. Bang Kimung ude tahu tuh. Ngape sih Bang Kimung kagak mao nyerahin si Dempak ke Ketua RT supaya bisa dideportasi..”
Kimung ngakak ngedenger istilah deportasi dari mulut Bang Mas’ud.
“Ente kayak penguase negeri jiran aje, pake istilah deportasi segale.”
“Istilah deportasi lebih enak dikuping Bang Kimung, daripade saye pake istilah diusir. Ade ape emangnye. Kayaknye kok berat amat..”
“Berat pigimane? Pan Si Dempak ude ngadep Ketua RT. Nggak sembarangan kite ngusir orang. Ade prosedurnye. Lagian, ape bener omongan di Dempak ude ngehina Kyai Pendi?”
“Ntu die sualnye. Supaye jelas ujung ceritenye, kan mendingan minta Ketua RT, panggil di Dempak, Kyai Pendi, ame anak-anak yang ngedenger omongan si Dempak sual Kyai Pendi.”
“Ini yang ente kagak tahu, Bang Mas’ud. Sual si Dempak, sual gampang. Sumpe ditabrak kodok.., saye kagak ngebela tuh anak.”
“Kalo sual gampang, kenape jadi Bang Kimung ribet amat. Kayak lagi nyari keteknye uler.”
“Maksud ente?”
“Saye ame warga di sini ngeliat, Bang Kimung kagak karoan. Jamaah masjid minta serahin si Dempak yang diduga ngehina Kyai Pendi, tapi Bang Kimung sibuk ke sono ke sini. Ke Pengurus Masjid sebelah lah. Ngundang ustadz ame Kyai makan malem lah.”
“Bang Maksud, ane ngelakuin ntu ngikuti omongan stap. Maksudnye supaye Pengurus Masjid kampung sebelah ame Kyainya bisa ngebilangin Kyai Pendi supaya jangan pake ngerahin jamaah masjid demo ke depan rumah saye.”
“Bang Kimung.. sejuta kali Bang Kimung lakuin yang model kemaren tuh.. ke sono ke mari.. jamah masjid pasti bakal terus demo. Percaye deh omongan saye..”
Mpok Wati ngedeketin Bang Kimung dan Bang Mas’ud. Die duduk di deket bang Mas’ud, jadi adep-adepan ame Bang Kimung.
“Romannye serius amat. Lagi ngebahas apaan sih?”
“Lagi ngebahas demo jemaah masjid ke depan rumah bang Kimung, dua Jum’at kemaren..”
“Boleh dong saye nimbrung..”
“Bole mpok.. bole banget,”seru Bang Kimung kepada Mpok Wati.
“Bang Kimung jawab ye pertanyaan saye. Kenape sih ngebiarin persualan jadi ngelebar ke mane-mane? Sumber masalahnye kan si Dempak. Ade ape Bang Kimung ngelindungin si Dempak. Gara-gara anak songon kayak begitu, orang sekampung jadi rame..”
Mpok Wati menatap tajam ke arah Bang Kimung. Bang Mas’ud merhati’in lebih serius. Bang Kimung begidik. Die kagak nyangke, perempuan cantik idola hatinya, itu menatap tajam kayak begitu.
“Jawab dong.. Bang Kimung. Emangnye ade yang ngelindungin si dempak, sampe segitu bingungnye Bang Kimung ambil putusan? Siape? Bilang aje.., biar saye yang datengin pelindungnye si Dempak,”lanjut Mpok Wati dengan nada tinggi.
Denger Mpok Wati bersuara tinggi, pelanggan yang lagi makan pade nengok. Bang Jumhur ame Bang Suja, kontan narik kursinye ke meha tempat Bang Kimung ame Bang Mas’ud duduk.
“Ade ape nikh.. ade ape? Masih sual si Dempak ye?” tanya Bang Suja.
“Sual ape lagi kalo bukan sual si Dempak, Bang Suja..,” balas Mpok Wati.
“Bang Kimung buruan serahin tuh si Dempak.. Jangan sampe semua warga di sini ngamuk.”
“Iye Bang.. iye.. Sekarang di Dempak lagi meriang. Begitu die enakan, saye bawa ke Ketua RT.”
“Kapan Bang Kimung mao serahin si Dempak.. Tunggu dua hari ye.. sualnye orang meriang kan makan waktu seminggu..”
“Baek Bang Kimung. Inget ye.. kalo ente kagak serahin atawa ente kagak pulangin ke kampungnye.., anak-anak muda bakal nyaronin rume Bang Kimung lagi. Paham?” sergah Jumhur.
“Baek Bang Jumhur. Baek...,” janji Bang Kimung.
Bang Kimung mukenye pucet. Die buru-buru ngasih duit ame Mpok Wati, bayar makanan yang die makan ame Bang Mas’ud tadi. Terus buru-buru ke luar.
Sial nasibnye Bang Kimung. Baru mau ngelangkah dari depan warung, serombongan anak muda dateng. Tiga orang anak muda maksa Bang Kimung duduk di bale. Dua anak muda laen, nunjukin kembangan silat. Bang Kimung keder atinye ngeliat situasi.
“Buruan temuin Kyai Pendi.. kasih tahu, Bang Kimung ade di sini nikh,”ujar salah seorang anak muda, sambil ngerenggut baju Bang Kimung. Muke Bang Kimung Pucet.
Jumhur bereaksi cepet. Die minta tu anak muda ngelepas baju Bang Kimung. Tu anak muda ngelepas renggutannye, sambil ngedorong Bang Kimung, sampe die ampir ngejengkang di atas bale.
“Bang Kimung catet baek-baek. Jangan maen-maen ame Kyai Pendi. Emangnye ape sale Kyai Pendi, sampe si Dempak ngebilang die suka ngebohongin umat. Tahu ape die sual Kyai Pendi?”
Pemuda lain yang masih nampak kesal ngedeketin Bang Kimung. Kepelannye die taro persis di muke Bang Kimung. “Ente kan tau...., gimane kite ngehormatin Kyai Pendi. Orang sekampung ni kagak bakal melek ugame, kalo kagak ade Kyai Pendi..,” tukas anak muda itu.
Bang Kimung makin pucet mukenye. Bang Mas’ud ngeredain ati tu anak muda.
“Ude de.. tadi Bang Kimung ude janji ame ane, Bang Suja, Mpok Wati dan Bang Jumhur. Die janji bakal nindak si Dempak dua hari,”ujar Bang Mas’ud.
“Maksudnye, dua hari ke depan si Dempak bakal diusir dari kampung kite?”
“Iye.. iye.. saye janji..,”ucap Bang Kimung spontan.
Mpok Wati keluar. Die nimbrung ngomong.
“Ude.. gini aje.. daripade lu pade ribut di depan warung gue, mendingan bawa Bang Kimung ke rumah Kyai Pendi,” ujar Mpok Wati.
Bang Kimung manggut. Anak-anak muda ntu juga sepakat. “Bang Kimung kudu minta maap ame Kyai Pendi. Abis ntu, usir deh si Dempak pulang ke kampungnye,”ujar Ma[ok Wati.
“Baek Mpok.. Baek.. saye janji..,”kate Bang Kimung.
“Bang Jumhur, bang Suja, bawa Bang Kimung ke rume Kyai Pendi.. lu lu pade, ikutin.. Sekarang..,” seru Mpok Wati.
Di pimpin Bang Jumhur, Bang Kimung dibawa ke rumah Kyai Pendi. Bang Suja nyuruh salah seorang anak muda ke rumah Ketua RT ame Ketua RW.
“Bilangin ame Ketua RT dan ketua RW buruan dateng ke Kyai Pendi. Bang Kimung mao ngeberesin sual si Dempak,”ujar Bang Suja.
Tu anak muda spontan lari sesuai perentah Bang Suja. Larinye kayak sumpritan abis dipletokin. Orang-orang yang lagi makan di warung Mpok Wati ngeliatin adegan itu.
“Gara-gara si Dempak seorang, kampung kite jadi ribut,”cletuk salah seorang.
“Lagian.., ngapain juga Bang Kimung musti ngelindungi kacungnye yang songong..,” timpal yang lain.|
