Politik Songong

KARENA liburan long weekend, Warung Pok Rojané ‘diserbu’ pembeli. Di sudut warung sudah duduk Koh Aming, Ci Cai, Wan Segaff, Ipah Habsy, dan Bang Duloh. Ngeliat tampangnye pade, ude kagak sabaran pengen makan.

“Jangan lupa Pok Wati, ane pesen kalio daging ye..,”ujar Wan Segaff.

“Iye Wan.. Sabar dulu ye.. Saye masih ngelengkapin semue menu nikh. Pade ngobrol dulun deh..,”balas Mpok Wati yang makin tambah umur makin kelihatan bersinar.

“Bang Dulo.. Koh Aming, ude pade denger tuh deklarasi salah satu partai yang ngedukung Ahok?”

“Ude.. Lucu ye.. !?” balas Bang Duloh.

“Aduh.. Owe ketinggalan berita.. Gimana beritanya?” sambung Koh Aming.

“Partai yang lambangnye anak pane nancep ke tembok, ntu Koh Aming..,”seru Bang Duloh.

“Maksud Bang Duloh Partai Hanura?” sambung Ci Cai. Bang Duloh manggut-manggut.

“Gimana ceritanya?” sambung Koh Aming.

“Begini nikh.. Begitu abis deklarasi, ade pernyataan, tuh partai bakal ngebantuin Teman Ahok ngumpulin KTP,”timpak Ipah Habsy.

“Kok lucu.. Emang suara dua partai tambah KTP yang udah dikumpulin belon cukup, buat maju jadi Calon Gubernur dan Wakil Gubernur?” tanya Koh Aming.

“Kayaknya sih begitu. Kalo ude cukup, ngapain lagi musti ngebantuin ngumpulin KTP?”balas Bang Duloh.

“Iya yah… ,”balas Ci Cai sambil melirik Ipah Habsy. “Jadi yang selama ini dibilang jumlah KTP yang dikumpulin, udah cukup ternyata gak begitu?”

“Wah,.. kalo soal ntu saye kagak tahu tuh, Ci..”

Mpok Wati dibantu asistennye ngedeket ke meja mereka. Meletakkan piring berisi masakan yang mereka pesan masing-masing.

“Nah, sekarang makan dulu ye.. Sambil nerusin ngobrol juga boleh..,” ungkap Mpok Wati terus kembali ke tempatnya melayani pembeli laen, yang keliatannya juga ude pade laper.

“Yang seru sih bukan ntu, Ci Cai…” ungkap Ipah Habsy.

“Apaan tuh?” balas Ci Cai.

“Abis deklarasi, beberapa pengurus daerah tuh partai pade ngelepas jaket seragam partai. Ganti pake kaos oblong,” sambung Ipah Habsy.

“Kaos oblong gambar Mickey Mouse?” tanya Ci Cai lagi?

“Gak lah.. Tapi di dada tu kaos ade tulisan yang intinye menolak Ahok. Orang-orang yang ngaku Wakil Ketua ame kader tuh partai menyatakan keluar dari partai yang baru aje deklarasi.”

“Wah.. gara-gara partai ngedukung Ahok, terus beberapa pengurusnya keluar dari partai itu..,” desak Koh Aming.

“Itu sih biasa Koh.. Pasti ade aje yang kagak setuju,” cletuk Wan Segaff.

Bang Duloh mengalihkan pembicaraan. Dia bilang, soal dukungan partai, selaen didukung Partai Nasdem dan Hanura, Ahok ude yakin banget dirinye bakal didukung ame PAN, juga PDIP. Tapi, dia terus ngasih pernyataan, dirinye bakal maju lewat jalur independen.

“Ahok lagi ngeyakinin masyarakat, dirinya kagak anti partai, tapi juga kagak mao dikendaliin partai,”tukas Bang Duloh.

“Boleh juga tuh taktik Ahok. Supaya nanti kalo dia kepilih kagak musti mikul beban partai,”jelas Wan Segaff.

Bang Duloh mengambil gelas berisi teh pandan. Seruput. Terus narik napas ngerasain enaknye teh pandan.

Ketika sedang nikmat-nikmatnye makan. Mpok Wati mendekat. “Ntar plastik bekas bungkusan kerupuk pisahin ye..,”serunya.

“Buat apaan Pok ngumpulin bekas bungkusan kerupuk?” tanya Ipah Habsy spontan.

“Supaye warung saye didatengin Sandiaga Uno,”jawab Mpok Wati.

Bang Duloh, Wan Segaff, Ipah Habsy, Koh Aming, dan Ci Cai terlongong.

“Ape hubungannye? “ tanya Bang Duloh.

“Kan Sandiaga Uno lagi rajin mungutin sampah.. kemaren,.. waktu liburan, die ame pendukungnya mungutin sampah tuh di Thamrin..,”jelas Mpok Wati.

Semua pada mesem, kecuali Bang Duloh yang ngakak.

“Bang Duloh jangan ngakak kayak gitu. Gak ape-ape kali.. narik simpati warga Jakarta pake cara kayak begitu?“ balas Mpok Wati.

“Pok Wati.. kalo ketemu ame semue nama bakal calon Gubernur yang bakal berlaga di Pilkada, bilangin ye.. supaye semuenye jangan pade ngelakuin politik songong..” tukas Bang Duloh.

“Maksud Bang Duloh ape? “

“Semue kudu pake tatakrama ngehormatin putera – puteri daerah Betawi..”

“Duloh.. Duloh.. giniari ente masih ngeributin putera daerah.. Siape yang mao dengerin? “ tukas Wan Segaff disambut senyum Ipah Habsy, Koh Aming, dan Ci Cai.

“Supaye pade dengerin, sekaligus ngeh.. ane sengaja tereak.. Kite-kite kudu tereak,” balas Bang Duloh.

“Kan udah ada Haji Lulung ame Bang Haji Nachrowi Ramli yang bakal ikutan jadi bakal calon…,” tukas Koh Aming.

“Koh.. Wan.. Ipah, ame Cici.. dengerin ye.. Haji Lulung dan Bang Nachrowi Ramli itu politisi. Betawi profesional ambil juga dong.. Kite punye Bang Daus yang ahli urusan keuangan buat ngenyejahterain rakyat. Kite punye Mpok Silvy yang ude pengalaman di pemerentahan DKI. Kite punye Bang Jack Bul jagoan jaminan sosial. Kite punye juga Mpok Yani yang gak pernah bosen naekin harkat pengusaha pribumi,”jawab Bang Duloh.

“Maksud Bang Duloh.. supaye semua orang yang lagi dokoh mao ngikutin Pilkada DKI ame parpol-parpol pendukung die-die pade milih Betawi yang profesional?” Mpok Wati.

“Bener… Cakep kan?” balas Bang Duloh sambil nyengir, lantaran perutnye ude kenyang.

“Saye setuju.. Tapi, tanya dulu tuh ame Bang Daus, Mpok Silvy, Bang Jack Bul, dan Mpok Yani.. pade mao kagak bakal ngedampingin para bakal kandidat yang ngotot mao jadi Gubernur?” ungkap Mpok Wati.

“Kalo kite-kite sepakat.. Ntar ane usulin ame Bang Pendi, Bang Sani, Bang Benny, Bang Nasir buat ngerembug.. Terus ngundang semuenye.. Di antara yang berempat ntu, siape yang mao..,” sambung Bang Benny.

“Emangnye ade yang kagak mao, Bang?” cetus Ipah Habsy.

“Kalo Betawi kan begitu.. Nggak dokoh-dokoh amat ame jabatan.. Karena jabatan ‘kan amanah.. Jadi kite yang musti ngedesek.. Termasuk ngusulin ke Ketua-Ketua Partai dan bakal-bakal calon tuh..”

“Ahok kan ude milih calon wakil yang laen,” seru Koh Aming.

“Koh.. kalo dia mah jangan disebut lagi..”sergah Cici Cai.

Mpok Wati meninggalkan mereka. Kembali ke tempatnya, lantaran pelanggan yang habis makan sudah pada mau bayar. Wan Segaff dan Ipah Habsy berdiri, mendekati Mpok Wati, juga membayar kudapannya. Begitu juga Koh Aming dan Ci Cai.

Bang Duloh sekali lagi nyeruput teh pandan anget kesukaannya, sambil ngelirik Mpok Wati.., yang die demenin waktu masih jadi gadis belia. |