Kalo Nyak Jadi Gubernur

| dilihat 2692

WAROENG Mpok Rojané kayak jalan Bogor – Puncak – Cianjur. Buka – Tutup selama bulan Ramadan. Mpok Wati pemilik tu warung bikin aturan. Warung buka mulain jam 17:00, tutup jam 22:00 waktu Indonesia Betawi.

Menu masakan dikurangin. Nggak selengkap hari biase. Menu yang bertahan, praktis cuman Lontong sayur, empal, kalio daging, goreng ayam,  ame soto betawi, tambah asinan, dan bir pletok.

“Menu kok dikurang-kurangin, Nyak?” tanya Kholila anak bontot Mpok Wati.

“Iye.. kan lagi puase. Kalo menu kite lengkap dampak budayanye gak bagus,”jawab Mpok Wati.

“Dampak budaye, Nyak? Lila baru denger tuh,” sahut Kholila yang lagi kuliah S2 jurusan Mine Management di salah satu universitas beken di Malaysia. Dia baru pulang beberapa hari lalu, menyambut Ramadan.

“Pasti Lila baru denger, kayak emak Nyak baru denger yang tadi Lila ngomong tuh.. Best practice mining, waku ngomentarin rusaknye alam lingkungan di Bogor Barat, lantaran Jakarta bikin reklamasi di teluk Jakarta,”jawab  Mpok Wati.

Lila tersenyum.

“Ape yang Nyak maksud tentang dampak budaye, kalo menu masakan warung kite lengkap kayak biasanye?”

“Lila.. sekarang bulan Ramadan. Bulan bagi kaum perempuan, utamanye anak gadis, bini, ame mertua atawa emak-emak unjuk kebolehan. Masak buat seluruh anggota keluarge buka puase. Abis ntu pade solat maghrib  ame taraweh berjamaah.”

Kholila mengangguk-angguk.

“Bulan Ramadan kudu jadi momentum seluruh anggota keluarga ngumpul di rume. Buka ame sahur di rume masing-masing. Jadi menu masakan kite dikit aje.. cuman buat mukimin yang pade kos di kampung kite, ame musafir yang lewat sini pas maghrib lantaran gak bisa ngehindarin macet.”

“Jadi keputusan Nyak ngurangi menu, tujuannye ntu..?”

“Pan nyak ude bilang. Setiap keputusan ape aje musti kite liat manpaatnye buat orang banyak. Pan Allah ude ngasih kite otak buat mikir, ngasih kite ati buat ngerasa..”

“Sisi lain dari dampak budaye ntu ape nyak?”

“Masakan kite kagak mubazir. Kite tahu ukuran. Jadi, secara ekonomis kudu pas itungannye. Selaen ntu kan ade perintah ugame yang dicontohin Rasulullah Muhammad SAW.. sedekah ame anak yatim dan fakir miskin..”

Lila kembali mengangguk. Dia ngebayangin pertimbangan Mpok Wati, emaknye yang begitu komprehensip dalem menghitung strategi bisnis dan dampak budaye warungnye.

“Lila.. kite ni orang Betawi. Dari kecil ude diajaran ilmu manthiq di madrasah, logika bahase.. Begini-begini Nyak juga belakjar ilmu kalam yang jura berususan ame logika. Makanye logika ame naluri kudu dipake dalem ngebuat keputusan, supaya kagak nyalahin orang kalo terjadi ape-ape.

“Waduh.. Nyak kayak gubernur aje?”

“Emang.. Lila pikir, mentang-mentang cuman punya warung peninggalan bebe lu terus Nyak kagak mampu mimpin Jakarta? Ahok aje bisa, masak Nyak lu nyang pinter bijaksane jujur berakhlak beriman tiada tare begini, kagak bisa?”

Lila tertawa.

“Lila jangan ketawa denger Nyak ngomong gitu. Kalo ngelola warung aje Nyak bisa, artinye gantiin Ahok, pasti Nyak bisa. Ape lagi, Nyak lebih pinter jage mulut, kagak doyan nyap-nyap..”

Lila memandang Mpok Wati. Serius.

“Ngurus Jakarta kan beda ame ngurus warung, Nyak? Beribu kali lipet berat dan rumitnye..?”

“Lila.. Lila.. suruh Ahok gantiin Nyak di warung sini, die dagang ngadepin selera banyak orang, kalo die mampu sehariii aje.. Nyak dukung die..”

“Kalo Nyak disuruh jadi gubernur Jakarta?”

“Lila.., asal tahu ye.. pekerjaan gubernur Jakarta ntu cuman enem puluh persen dari kerjaan emak-emak kayak Nyak lu ni..”

“Maksud Nyak?”

“Kerjaan Gubernur itu ibarat bini.. duduk bareng ame laki, nyusun prioritas ape aje yang kudu dilakonin diwujudin dari hari ke hari, minggu ke minggu, bulan ke bulan, taon ke taon supaya idup lebih baek. Terus nyusun anggarannye deh..”

“Terus?”

“Lila tanya ame semua emak-emak di Betawi.. ape aje prioritas program keluarganye pade.., pasti sama.”

“Ape tuh nyak..”

“Pertama, ngejamin pendaringan ame dapur aman. Artinya, sumber pangan tersedia, aman, mudah di dapat, dan murah.. Kedua, bisa kebeli ame rakyat.. artinye kudu banyak lapangan kerja ame lapangan usaha, supaye daya beli rakyat meningkat. Ketiga. anak-anak bisa sekole, rakyatnye pade sehat.. seger buger kagak rentan ame penyakit.”

Mpok Wati ngelirik Kholila anaknya. Terus melanjutkan omongannya. “Yang keempat lingkungan kudu bersih, sehat, cerdas, supaya penyakit nggak ngendon.. cegah tuh penyakit, jangan sampe puskesmas penuh, makin dikit orang sakit makin bagus..”

Nah, supaya orang yang sakit lantaran stress juga kagak banyak, lalu lintas kudu dibenerin. “Kalo Nyak jadi gubernur, pajak sepeda motor ame mobil tua, sama ame mobil baru. Bus Way yang cocok di Bogota tapi kagak cocok ame Jakarta, Nyak setop. Jalur Bus Way dikembaliin. Kualitas angkutan umum ditingkatin, bareng ame pembangunan light rapid traffic – LRT,”ujarnya.

“Nyak tahu-tahu begituan..”

“Lila.. biar cuman mpok-mpok pengurus warung, nyak lu ni lulusan perguruan tinggi.. Nyak lu bukan cuman sekedar hamil ame beranak.. Nyak sekole tinggi-tinggi supaye bisa ngurusin Lila ame abang dan mpoknye Lila punya mitra dialog..”

Lila tertawa. Dia peluk Mpok Wati, ibunya yang sangat dia banggakan.

“Jadi, Nyak cocok jadi Gubernur DKI Jakarta?”tanya Lila.

“Kalo ukuran Gubernur ideal buat Jakarta cuman Ahok,  sumpe.. Nyak lu nikh layak dan patut.”

“Pan Ahok ude bikin perobahan, Nyak?”

“Perobahan jengkol? Perobahan yang bikin jengkel ame dongkol? Kalo cuman ntu, gak usah die jadi Gubernur.. Bang Cauk jagoan pasar lebih mampu dari Ahok.”

“Eittt... ude ye Nyak.. kite ngomong soal laen.. Kita lagi shaum.. puase.. kagak baek ngomongin orang..”

“Lila.. Lila kudu mampu ngebedain mane yang ngomongin orang, mane yang merupakan ekspresi kritis kite..., yang Nyak omongin ni namenye ekspresi kritis.. Bukan ngomongin orang.. Kagak paran nyak ngecaprak kayak Ahok ngecaprak soal sabotase, soal RT – RW segale macem. Suruh die protes ame laut.. kenape jebolin tanggul di pantai Mutiara, sampe orang-orang kaya di sono pade kerendem rumahnye.. “

Tiba-tiba terdengar adzan dzuhur. Lila ngajak Mpok Wati masuk ke dalem rumah. “Lohor dulu yuuk Nyak..,”ujar Lila, sambil merangkul emaknye.., terus jalan ke dalem rumah.. | 

Editor : sem haesy
 
Ekonomi & Bisnis
12 Mar 24, 10:56 WIB | Dilihat : 275
Nilai Bitcoin Capai Rekor Tertinggi
02 Mar 24, 07:41 WIB | Dilihat : 138
Elnusa Bukukan Laba 2023 Sebesar Rp503 Miliar
Selanjutnya
Sporta
07 Jul 23, 08:50 WIB | Dilihat : 1096
Rumput Tetangga
Selanjutnya