Jangan Percaya Spanduk

| dilihat 1906

PAGI yang ceria. Mpok Wati lagi sibuk menata aneka juada di warungnye. Sebagian masakan aneka menu ude berkurang jumlahnye, lantaran pelanggan yang datang sarapan, lumayan banyak.

Seseorang, sambil bersiul melangkah ke pintu warung. Lantas memberi salam, begitu sampai di pintu warung. Mpok Wati spontan membalas salam itu.

“Eh.. Bang Jamal. Romannye gembira amat?”tanya Mpok Wati.

“Ya gitu deh.. Gimane kagak gembira. Semua pasangan calon Pilkada Jakarta ude jelas.”

“Koq pake gembira?”

“Kite kudu gembira, Mpok. Kejelasan siape aje yang jadi kandidat Gubernur dan Wakil Gubernur Jakarta, bikin ati kite lega.”

“Lega kenape?”

“Lega, lantaran rakyat sebagai pemilih ude punya pilihan yang jelas, siape aje yang bakal dipilih nanti.”

“Ooo.. gitu. Iye sih.. Rakyat ude tahu, Ahok pasangan ame Djarot. Rakyat juga ude tahu, Agus Yudhoyono pasangan ame Sylviana Murni. Dan,.. Anies Baswedan pasangan ame Sandiaga Uno.”

“Ngomong-ngomong Jamal berpihak kemane nikh?”

“Kalo saye jelas.., yang ade Betawi-nye.”  

“Bang Jamal jadi relawan?”

“Bergantung.. Mpok. Kalo diajak jadi relawan, saye siap. Kalao kagak diajak, saye tetep bantu sebisanye.”

“Saya juga begitu, Bang.”

“Masing-masing pasangan calon pastinye ude punya tim sukses. Partai-partai yang ngusung, pasti ude ngebentuk tim. Masing-masing pribadi calon, pastinye juga ude ngebentuk tim pemenangan juga. Jadi, kite jalan sendiri aje, ikhlas ngebantu.”

Ketika keduanye lagi ngobrol, dateng Koh Aming. Die pesen makanan kesukaannye: ketupat sayur ame daging semur. Terus duduk deket Jamal.

“Bang Jamal mao sarapan juga?”

“Saya ngopi aje, Mpok.. Ude sarapan di rumah.”

Koh Aming memandang Jamal.

“Koh Aming gimane kabarnye? Ke mane aje?”

“Baek Bang Jamal. Biasa deh.. Kan Cici buka bisnis baru. Bisnis telor. Pesenan lagi banyak-banyaknya.”

Mpok Wati mengantar makanan yang dipesan Koh Aming, terus duduk di kursi lain, persis di belakang kursi yang didudukin Jamal.

“Apa pendapat Bang Jamal ama Mpok Wati soal pasangan calon Gubernur – Wakil Gubernur Jakarta yang ude diumumin?”

“Biasa saje, Koh. Menurut saye, tiga pasangan calon bakal bekutet narik simpati rakyat. Termasuk pasangan Ahok – Djarot, yang ude kadung ngelukain ati rakyat.”

“Ketige pasangan calon emang kudu berjuang abis-abisan buat ngebangun kepercayaan rakyat. Soalnye, watak orang Jakarta dalam memilih pemimpin kan beda ame daerah laen.”

“Maksud Bang Jamal ame Mpok Wati, semua pasangan calon musti narik simpati sebanyak-banyaknya?”

“Ya gitu deh, Koh. Pan Koh Aming ude tahu. Dari macem-macem berita yang seliweran selama ini, dari ketiga pasangan calon, ude keliatan, mane yang kucel, mane yang masih seger, mane juga yang mulain keliatan sternye.”

“Simpati rakyat Jakarta ame ketiga calon juga macem-macem jenisnye. Kayak saye, misalnye, ngasih simpati ame pasangan calon tertentu lantaran punya solidaritas kaum. Mpok Wati ame Koh Aming boleh jadi juga punya pertimbangan yang sama. Bisa juga beda ame pertimbangan saye.”

“Bang Jamal bener. Sikap saya beda. Saya sih yang rasional dan realistis aja. Siapa sebenarnya yang sudah bikin kita nyaman sebagai warga Jakarta. Saya gak percaya ama kata-kata yang ditulis di spanduk.”

“Ape umpamanye?”

“Umpamanya ada pasangan calon yang bilang sudah teruji dan terbukti. Teruji dan terbukti apa? Bikin Jakarta seperti yang diharapkan warga? Atau kebalikannya..”

“Saye sepakat ame Koh Aming. Kalo dibilang teruji dan terbukti bikin Jakarta lebih baik, kagak juga. Buktinye, banjir, macet, sampah, ame segala macem hal, Jakarta masih babak belur.”

“Soal yang satu ini, saye setuju ame pikiran Koh Aming dan Bang Jamal. Semue pasangan calon ude pade berbuat, tapi belon maksimal. Belon ade yang maksimal ngurusin Jakarta, termasuk pejawat,”sela Mpok Wati sambul beringsut, lantaran ade pelanggan yang masuk dan pesen makanan.

“Tulisan di spanduk bukannye nunjukin perbuatan nyata, Koh?”

“Kagak begitu juga, Bang Jamal. Sebagai penentu, bakal pemilih, kita mikir aja sendiri dah. Apa aja yang kita rasain sekarang. Udah sesuai ama yang diomongin atau belon.”

“Koh Aming kagak baca spanduk Sudah Teruji & Terbukti? .”

“Udah.. Tapi, teruji apanya? Ngotot ngegolin reklamasi? Terbukti ngegusur rakyat?”

Jamal tertawa ngakak. Tiba-tiba Mpok Wati yang baru mengantar makanan kepada pelanggan di meja deket jendela warung, nyeletuk, sambil deketin Jamal ame Koh Aming.

“Jangan percaya tuh ame spanduk, Koh.. Bang..” cletuk Mpok Wati.

“Mpok Wati betul.. Jangan kan sama bunyi spanduk, sama kiriman berita melalui media sosial aja saya gak tertarik,”cletuk Koh Aming.

“Ude deh.. sekarang kite punya dua pasangan calon nikh. Mpok Wati gimane.. ke mane hati Mpok Wati mantep?”

“Saye sih mantep ke pasangan calon yang ade Betawi-nye.”

“Saye juga begitu,”ungkap Jamal.

“Kalo saya masih nunggu program-program dari kedua pasangan calon. Pas apa nggak sama maunya saya.”

“Koh Aming ngikutin saye aje...,” goda Mpok Wati.

“He he he.. Belon kampanye Mpok Wati..,”balas Koh Aming.

Koh Aming membayar harga makanan yang disantapnya tadi. Terus pamit.

“Mpok.. ngomong-ngomong Bang Idrus gak ke sini-sini?” tanya Jamal.

“Ude seminggu gak keliatan, Bang Jamal.. Lagi ke Bogor kali..,”cletuk Mpok Wati.

“Ngomong-ngomong saye pamit dulu ye..,”sambung Bang Jamal terus pergi. Mpok Wati sempet ngeliat Bang Jamal melangkah pergi. Gak lama, hujan turun, kayak diseborin dari langit.. Makin gede makin deres. | 

Editor : sem haesy
 
Seni & Hiburan
03 Des 23, 14:05 WIB | Dilihat : 431
Kolaborasi Pelukis Difabel dengan Mastro Lukis
29 Sep 23, 21:56 WIB | Dilihat : 1502
Iis Dahlia
09 Jun 23, 09:01 WIB | Dilihat : 1320
Karena Lawak Chia Sekejap, Goyang Hubungan Kejiranan
Selanjutnya
Energi & Tambang