Jangan Mancing-Mancing
UDE dua minggu Bang Pendi gak nongol. Ketidak-hadiran Bang Pendi, bikin Mpok Wati rindu se rindu-rindunya. Semua sobat Bang Pendi yang nongol di warung Mpok Rojané, semua dia tanya. Termasuk Koh Aming dan Wan Segaff.
Begitu Bang Duloh nongol, dan baru aje duduk di kursi pojok depan Koh Aming, Mpok Wati ude nyamperin.
“Yang kayak biase.. Gabus Pucung, satu..,”ujar Bang Duloh yang menyangka, Mpok Wati bakal nanya menu ape yang bakal die pesen.
“Tunggu dulu mesennye.. Bang Duloh kagak tahu ke mane Bang Pendi? Ampe dua minggu begini die kagak nongol..?”
“O.. soal sohib ane Pendi, Mpok Wati kagak use kuatir.. Die lagi rehat serehat-rehatnye di Dago – Bandung..”
“Emangnye kenape pake rehat lama binan?”
“Kan Bang Pendi kena tipes.. Dirawat di rumah sakit seminggu.., terus disuruh rehat baring deh seminggu...”
“Ngomong-ngomong, boleh ditengokin gak?”
“Duuuu.., yang lagi kangen serindu-rindu...” canda Bang Duloh, membuat hati Mpok Wati berdebar. Lantas tersipu-sipu.
Mpok Wati kembali ke posisinya semula, di belakang etalase makanannye. Ngeracik pesenan Bang Dulo: Gabus Pucung tambah sambel limo. Bang Duloh menunggu racikan Mpok Wati dengan senang ati.
“Bang Dulo ngamatin siaran televisi soal Ahok, Bepeka, ame Sumberwaras?” tanya Koh Aming.
“Ati owe kok ngerasa ade yang diumpetin. Omongan Ahok ame penyokong-penyokongnya keliatan banget kayak omongan orang panik. Menurut bang Dulo, yang ude malang melintang di dunia wartawan, gimane?”
“Koh Aming kagak sale.. Bener banget mikirnye. Kalo kagak ade yang diumpetin, Ahok ame pendukungnya kagak perlu ngotot kayak orang kesetanan.. Biasa aje...”
“Kalo gitu bener bini owe,”sambung Koh Aming.
Seketika Mpok Wati dateng, naro piring berisi nasi dan piring berisi Gabus Pucung ke depan Bang Duloh.
“Sikap eksplosif, ngotot, melecehkan pihak lain yang dianggap merugikan, dan bersikap kurang ajar dan asal ngebales pendapat orang yang dianggap serangan dalam perdebatan media, menunjukkan ade sesuatu yang diumpetin.”
“Ngomong-ngomong, ape yang diumpetin, Bang Duloh?”tanya Mpok Wati.
“Kebenaran! Salah satu ciri ngumpetin kebenaran adalah menimbun kebenaran itu dengan pembenaran,” sambung Bang Dulo.
Mpok Wati manggut-manggut, terus balik ke tempatnya semula.
“Terus terang Bang Duloh, owe kuatir.., lantaran belakangan ude keliatan muncul bibit-bibit rasialis..,”ujar Koh Aming.
“Bisa jadi kekuatiran Koh Aming bener. Sikap rasialis yang dibuka pintunye ame Ahok dan kawan-kawan, bakal ngebuka jalan munculnye sikap rasialis. Ini yang kagak disadarin Ahok dan kawan-kawan. Tapi Koh Aming kagak usah kuatir..,”sahut Bang Duloh.
“Gimane kagak kuatir, Bang Duloh..”
“Koh Aming ame sodare-sodare Koh Aming, aman.. pasti terlindungi.. Kite-kite bakal ngelindungin Koh Aming ame seluruh warga keturunan Tionghoa, ape aje agamanye.., lantaran Koh Aming semenjak lahir di tanah Betawi, bukan golongan rasialis yang bersikap rasis..”
Maksud Bang Duloh.., kaum Betawi dan mayoritas seluruh warga Indonesia, bukan penganut paham rasialisme dan bukan kaum yang bersikap rasis. Tapi, rasialisme dan sikap rasis bakal muncul karena dipicu oleh segelintir orang yang bersikap rasis. Mereka merasa dirinya minoritas. Lalu mikir dikhotomi minoritas – mayoritas. Padahal kenyataan di masyarakat hidup rukun-rukun saja.
“Coba Koh Aming inget-inget.. siape yang mulain ngomong soal Cina dan Kristen dua taon terakhir. Bukan kite-kite kan?”
“Bang Duloh bener.. Owe juga mikir gitu...”
“Mangkenye.. Koh Aming kasih tahu semue sodare-sodare, tenang-tenang aje.. Terus berusahe deh ngilangin semue hal yang bisa mancing lahirnye sikap dan tindakan rasis..”
Koh Aming menyimak dengan tekun, ketika Bang Duloh mengulang cerite. Bang Duloh cerita, sikap dan tindakan rasis sejak tahun 1619 selalu dipicu lantaran kelakuan segelintir orang yang memang berjiwa rasis, seperti Kapitan Su Ming Kang alias Ben Con. Begitu juga Lim Lacco yang lebih memilih bekerjasama dengan VOC katimbang ngebelain nasib pribumi yang blangsak akibat panjajahan.
Lantaran dikipas-kipas ame opsir dan penguase Belande, sikap Ben Con dan Lim Lacco jadi rasis dan menghadang masuknye orang-orang Jawa, Makassar, dan pribumi laen masuk berdagang ke Jacatra. Belakangan Bencon dan Lim Lacco baru sadar, ketika Belande majekin mereka dengan pajak yang lumayan berat. Apelagi pedagang-pedagang Cina, mulain ngelirik daerah lain di bawah kuasa Kesultanan Banten dan Mataram.
Perlawanan orang-orang Jawa, Makassar, Buton, Ambon, dan Bali terhadap tindakan Belanda dan orang-orang Cina yang jadi kaki tangan Belanda, cerita Bang Duloh, bukan menunjukkan sikap rasis. Melainkan sebagai sikap perlawanan untuk memperoleh hak yang sama. Terutama, karena mereka lebih awal sudah berdagang di Sunda Kelapa ketika masih dalam kuasa Prabu Surawisesa.
“Sekali lagi.. Koh Aming gak usah kuatir.. Kaum pribumi yang mayoritas di Jakarta, sejak jaman dulu ude bersikap egaliter, terbuka, dan pluralis.. Tapi, kalo dipancing-pancing ame kebijakan yang justru bersikap rasis, pasti bakal muncul perlawanan sengit,” jawab Bang Duloh.
Bang Dulo ngulapin Mpok Wati, yang buru-buru mendekat. “Mpok Wati itung ye.. sekalian tuh ame makanannye Koh Aming.” Mpok Wati tersipu. Koh Aming juga tersipu. “Kamsiah, Bang Duloh,”tukas Koh Aming.
Mpok Wati nyebutin angka yang kudu dibayar Bang Duloh, yang spontan ngeluarin duit dari dompetnye. Mpok Wati kembali ke tempatnya, lantas mendekati lagi Bang Dulo bawa kembalian.
“Kalo Bang Duloh ade kontak ame Bang Pendi, jangan lupa ye.. salam dari saya,”seru Mpok Wati. Bang Duloh tersenyum.
“Duilee.. Mpok Wati kayaknye kagen serindu-rindu nikh ame Bang Pendi...”cetus Koh Aming. |
