Jangan Banyak Cingcong

| dilihat 1791

SIANG yang temaram. Mpok Wati menata baskom berisi semur tahu, daging dan kentang, ketika Koh Aming dan Cici Cai masuk ke warung “Pok Rojane.”  Keduanya duduk di meja pojok, dekat kaleng kerupuk “Sumber Bahagia,” yang digantung di dinding.

“Nasi uduk ame pindang bandeng, ye Pok,”pesan Koh Aming.

“Oe ketupat sayur ame semur aje, Mpok,”susul Cici Cai.

Mpok Wati menyiapkan pesanan pasangan suami isteri, yang nampaknya baru pulang dari pasar Kebayoran Lama, itu.

“Tumben ginihari ude nongol, Koh..” tanya Mpok Wati, sambil nyiduk pindang kepala bandeng.

“Iye Pok..”

“Toko tutup?”

“Toko dijaga Sarmin,”sambung Cici Cai.

Mpok Wati mendekati keduanya, mengantarkan makanan pesanan.

“Koh.. saye denger anak-anak tim suksesnye Ahok ngedarin formulir lagi..?”

“Iye.. “

“Gara-gara formulir itu tuh.. si Koh Aming sewot sama toko sebelah, yang maksa-maksa penjaga toko kudu ngisi formulir dan foto kopi KTP buat Ahok.”

“Kok pake sewot segale.. Ngapain?” balas Mpok Wati.

“Oe gak suka caranye, Mpok. Memaksa itu bukan cara demokrasi,” balas Koh Aming.

“Lagian, Koh Aming ngapain juga gak mo ngedukung Ahok kayak temen Koh Aming yang laen?”

“Gak lah.. Masak gue kudu ngedukung orang yang oe gak demen.”

“Gak demen kenape?”

“Ah.. Mpok Wati kaya gak tahu aja.. Oe sekeluarga gak demen ama orang yang gak tahu etika dalam pergaulan. Apalagi sebagai penguasa.”

Mpok Wati yang sedang menata bakwan udang menoleh. Lalu duduk di depan Koh Aming dan Cici Cia.

“Asal Mpok tau ye.. sebagai manusia apalagi berkuasa, kita kudu nerapin yang namanya Li. Makasudnye etika untuk ngwujudin masyarakat yang sehat lahir batin dan saling menghargai,” ungkap Cici Cia.

“Paham.. saye paham. Maksudnye akhlak gitu ye..”

“Iye.. Kalo Mpok Wati ame sodara-sodara yang muslim bilangnye akhlak,” sambung Koh Aming. “Soal Li, itu ude diajarin semenjak jamannye Kong Zi, separoh abad sebelon Masehi.”

“Kokong oe ngajarin yang namanye Lizhi, Mpok.. kita kudu punya sopan santun dalam masyarakat yang adat, kebiasaan, dan lingkungannye beda-beda, beragam. Nah.. ini yang kagak kelihatan dua tahun Ahok mimpin Jegardhah.”

Mpok Wati manggut-manggut. Ia beranjak ke tempatnya, ketika Bang Sani nongol dan langsung duduk di depan Koh Aming.

“Gabus pucung, Pok.. “pesan Bang Sani. Mpok Wati kontan memilihkan makanan yang dipesan Bang Sani.

“Kayaknye lagi serius nikh. Ngebahas ape?”

“Biasa.. ngabahas Gubernurnye Bang Sani,”jawab Aminh spontan.

“Duuu.. sambil makan pindang bandeng ngebahas politik, pantes seru..,”sahut Bang Sani.

“Bang.. Gimane perkembangan terakhir... Siape dari kaum Betawi yang dijagoin buat maju ke Pilkada?” tanya Koh Aming.  “Pok Silvy jadi didorong, gak?”

“Koh Aming. Kaum Betawi yang pantes jadi DKI satu ame DKI dua banyak. Tinggal pilih aje. Ade Bang Daus tuh yang jago ngelola tetek bengek ngurusin duit. Ade Mpok Silvy yang piawai dan pengalaman ngurusin pemerentahan. Ade Bang Hasbullah yang biasa kite panggil Jack Bul yang jagoan banget soal jaminan sosial kesehatan. Ade Mpok Suryani yang pengusahe dan konsisten ngebelain pedang kecil. Tinggal pilih, semua layak..,”balas Bang Sani.

Mpok Wati mendekat, ngaterin pesanan Bang Sani.

“Bang Sani bener. Kudunye bos-bos partai ngeliat tuh. Juga mereka yang udah petantang-petenteng mau jadi bakal calon gubernur ame wakil gubernur,”seru Ci Cai.

“Kalo pade punya kepedulian sih, kudunye paham.. Kalo mao yang militer juga ade. Tinggal pilih aje..”ujar Bang Sani.

“Bang Sani.. ngomong-ngomong yang namenye abang sebut, mau kagak dijagoin, minimal jadi Wagub?”cletuk Mpok Wati.

“Kalo kagak mao, kite jorokin.. Enak aje pake nggak mao. Anak Betawi yang intelektual dan kece kayak mereka, kudu siap ngemban amanah,” balas Bang Sani.

“Bener Bang. Mereka itu kan penerus Babe Husni Thamrin yang abis-abisan berjuang ngebelain rakyat di parlemen jaman Belande.., ye..”

“Iye.. Volksraad namanye, bukan DPRD.”

Koh Aming, Cici Cai, dan Mpok Wati ketawa, ketika Bang Sani nyebut kata Volksraad, kepala gabus yang mau dimakan jatoh ke piring.

“Koh.. ane denger situ sewot ame tetangge toko di pasar. Kenape lagi? Ude tua jangan pake sewot-sewot.. “

“Bang Sani tahu dari siape?”tanya Ci Cai.

“Orang pasar cerita. Katenye gara-gara formulir ame KTP dukung Ahok, ye?”

“Begitulah Bang.. Oe gak suka orang maksa-maksa. Lagian, dua tahun belakangan, apa yang udah dibuat Ahok..” ungkap Koh Aming.

“Nggak gitu juga kali Koh? Pan banyak tuh yang pade ngirimin gambar-gambar yang katenye hasil kerja Ahok..,”cletuk Pok Rojane.

“Kalo cuman ntu sih belon apa-apa Pok. Lagian, semua pembangunan bantaran kali, jalan layang, underpass, dan segala macem ntu kan emang udah rencana lama sejak jaman Gubernur Foke,”balas Koh Aming.

“Koh Aming jeli ye.. ,”cletuk Bang Sani.

“Begitu juga soal sodetan kali Ciliwung ke kanal banjir timur, kan urusannye Kementerian Pekerjaan Umum.”

“Soal sampah aja masih belon tertata tuh. Yang oe denger belakangan sih lebih banyak bekutet ngurusin orang-orang yang dia curigain gak bener...,”ungkap Ci Cai.

“Yang Ci Cai ngomong kagak sale-sale amat. Tapi, pastinye ade dong yang baek-baek die kerjain. Pan die kendiri yang ngomong, die jujur ame anti korupsi..,” cletuk Mpok Wati.

“Yah.. Pok Wati.. kalo soal jujur gak usah diomongin, buktiin aja. Soal korupsi, siapa sih yang ngajarin pegawai-pegawai ame pejabat pade korupsi?”balas Ci Cai.

“Yang dibilang Ci Cai bener Pok. Korupsi di Betawi kan gara-gara upeti jaman Belanda.. Kokong-kokong oe juga tuh yang mulain..,”ungkap Koh Aming, disambut tawa berderai. “Uda deh.. jangan banyak cincong.. buktiin aje..”

“Pok Wati masih inget kan obrolan kita tempo hari?” tanya Ci Cai.

“Soal ape tuh?”

“Soal emaknye ibukota..”

“Inget-inget..”

“Dari omongan Bang Sani barusan, kaum Betawi dorong dong orang-orang hebatnye itu buat maju dalam Pilkada DKI taun depan.”

“Ci Cai.. soal itu, kite serahin ame bang Sani, bang Pendi, Bang Duloh ame Bang Benny aje ye..,”jawab Mpok Wati sambil ngelirik Bang Sani.

“Iye.. iye.. aspirasi Ci Cai, Koh Aming, ame Mpok Wati..., ntar ane sampein...”

“Buruan bang.. keburu tangeh. Kesorean.. Ntar telat tuh.. Bikin poster buruan.. tempel nikh di warung sini,”cetus Mpok Wati sambil melirik. Di kejauhan terdengar lagu Kicir-kicir dari dalam rumah. |

Editor : sem haesy
 
Energi & Tambang
Sainstek
26 Agt 19, 10:46 WIB | Dilihat : 418
Daya tarik Magnetis Monza SP2 Ferrari
30 Okt 18, 00:11 WIB | Dilihat : 847
Menerima Realitas Kecelakaan Lion JT610
19 Jul 18, 09:52 WIB | Dilihat : 1669
Volante Vision, Visi Kendaraan Udara Aston Martin
20 Feb 18, 12:07 WIB | Dilihat : 2588
Tragedi Archimides di Tangan Serdadu
Selanjutnya