Amprokin Aje

| dilihat 2447

LEBARAN ude lewat ampir seminggu. Mpok Wati masih belon juga buka warungnye. Sampe lebaran hari ketiga, die sibuk silaturahmi ke mane-mane. Termasuk ke Kebon Melati – Tenabang, ngider nyatronin sodara-sodara Bang Jali, almarhum lakinya.

Dua hari belakangan die keliling lebaran ke sodara-sodara empinye di Rawabelong.

Boleh jadi karena masih capek, ni hari, lepas Ashar menjelang Maghrib, keliatan Mpok Wati selonjor di bale pojokan depan warungnye. Keliatannya, Mpok Wati pengen nyegerin die punye kaki.

Walaupun begitu, yang namenye Mpok Wati tetep aje keliatan cantik. Mao diliat dari mane aje, Mpok Wati emang keliatan boto. Apelagi keramahannye kagak ade tandingannye.

Kedengeran, Mpok Wati bersenandung lagu Lebaran-nye Ismail Marzuki yang ditayang ulang salah satu stasiun televisi, tapi dicincang syairnye.

Setelah berpuasa satu bulan lamanya / Berzakat fitrah menurut perintah agama / Kini kita beridul fitri berbahagia / Mari kita berlebaran bersuka gembira //

Berjabatan tangan sambil bermaaf-maafan / hilang dendam habis marah di hari lebaran // Minal aidin wal faidzin / Maafkan Lahir dan Batin / Selamat Para Pemimpin / Rakyatnye Makmur Terjamin //

Dari segala penjuru mengalir ke kota / Rakyat desa berpakaian baru serba indah / Setahun sekali naek trem listrik perey / Hilir mudik jalan kaki pincang sampe sore / Akibatnya tenteng selop sepatu terompe / Kakinya pada lecet babak belur berabe //

Maafkan lahir dan batin / Selang tahun hidup prihatin / Cari wang jangan bingungin / Bulan Syawal kita ngawinin // Cara orang kota berlebaran laen lagi / Kesempatan ini dipake buat berjudi / Sehari semalem maen ceki mabuk brendi / Pulang sempoyongan kalah maen pukul isteri / Akibatnye sang ketupat melayang ke mate / si penjudi mateng biru / dirangsang si isteri //

Maafkan lahir dan batin / Slang tahun hidup prihatin / Kondangan boleh kurangin / Korupsi jangan kerjain //

Lagi bersenandung begitu, dateng Ci Cai, duduk di samping Mpok Wati.

“Kayaknye seneng banget nikh Mpok..”

“Iye Ci.. saye pikir-pikir tahun lima puluhan, waktu almarhum Ismail Marzuki ngarang lagu Selamat Lebaran, ude banyak persoalan terkait lebaran.”

“Ooo.. begitu ye.. Engkong owe pernah cerita, tahun-tahun segitu, Indonesia baru merdeka.. Hidup masih susah.”

“Iye.. tapi, almarhum Ismail Marzuki luar biase.. Die ude ngegambarin kondisi kehidupan rakyat yang bukan cuman gembira. Tapi juga soal urbanisasi, perjudian, kekerasan rumah tangga, ame ntu tuh.. korupsi.”

Lagi asyik ngobrol dengan Ci Cai, gak lama kemudian dateng Koh Aming dan Bang Idrus. Keduanya duduk di bangku panjang, seberang bale tempat Mpok Wati dan Ci Cai ngobrol.

“Serius amat ngobrol?” cletuk Bang Idrus.

“Iye nikh bang.. lagi ngomongin lagu Selamat Lebaran yang ditulis almarhum Ismail Marzuki. Seniman Betawi satu itu keren banget.., ude mikir jauh..”

“Iye.. Kalo kite nyimak syair tuh lagu, yang sayangnye dicincang ame stasiun televisi,.. kite bisa ngebayangin, sebenernye persoalan-persoalan sosial yang kite adepin hari ini, ude diprediksi lebih enam puluh tahun lalu..”

“Owe juga denger tuh lagu.., Mpok. Sayangnya, walopun pemerentah ganti berganti, tetep aja persoalannya gak pernah selesai. Bahkan, belakangan hari bertambah menjadi-jadi. Mulai dari urbanisasi, perjudian, kekerasan rumah tangga, sampe korupsi.”

Bang Idrus langsung nyamber. “Kagak salah yang Koh Aming bilang. Urbanisasi ude mulain diomongin, semenjak Walikota Sudiro ngedesek Bung Karno buat netepin Jakarta jadi Ibukota Negara.”

“Bener bang. Semenjak masa itu, berbondong-bondong orang desa ngadu untuk, berjudi nasib ke Jakarta. Perlahan-lahan, warga Betawi mulai kedesek..”

“Koh Aming kagak salah.. Yang duluan jadi kaum urban ngadu untung jadi kaum migran, nenek moyangnye Koh Aming ame Ci Cai.., kan.. Pade ninggalin Tiongkok, terus jadi Cung Kok deh di sini..”

“Mpok Wati kagak salah.. kenyataan sejarah emang begitu.”

Bang Idrus spontan angkat omongan. “Kakek moyang Koh Aming ame Ci Cai juga tuh yang ngajarin peting-petinggi kite kenal judi ceki, mabok brandy, ame korupsi.. Iye kan?”

“He he he.. Bang Idrus udah menjurus aja nikh omongannya,” balas Koh Aming sambil mesem.

“Soal sejarah kan kagak bisa dibantah, Bang Idrus. Engkong saya juga pernah cerita tuh.., soal sogok menyogok dimulain ama kakek moyang orang-orang Tiongkok yang migran ke sini.. Termasuk bawa Cokek ame gambang kromong..”

Tawa keempatnya pun berderai.

Tak berapa lama Koh Aming dan Ci Cai pamit, barengan datengnya rombongan anak muda pimpinan Jamal dan Udin yang mao latihan palang pintu di depan halaman warung Mpok Wati. Koh Aming dan Ci Cai menghilang dari pandangan, begitu Jamal dan Udin mulai berpantun.

Bulan puase kite tadarus. Taro Al Qurán di atas peti. Sungguh senang hati Bang Idrus. Asyik ngobrol ame Mpok Wati,” ujar Jamal mulai berpantun.

Udin gak kalah siak, die langsung bales. “Abis tadarus minum aer kendi. Kendi ditaro deket padasan. Kalo ade Bang Idrus mustinye ade Bang Pendi. Supaye Mpok Wati buruan bebesan,” bales Udin.

“Din.. kok bebesan?”

“Pan Bang Idrus ame Mpok Wati punya abang dan none.. Amprokin aje biar besanan. Kalo bang Idrus besanan ame Mpok Wati, palang pintu kite-kite ade yang nanggap,” balas Udin.

“Din, bilang tuh ame jamal, belajar pantun ame gue ye.. Supaye bener mantunnye..,”sela Bang Idrus.

“Gimane tuh pantunnye Bang Idrus?”sahut Jamal.

“Begini nikh.. Ke langgar kite tadarus. Bawa tembako dua kati. Siape yang bisa ngerogoh hati Bang Idrus. Siape lagi kalo bukan Mpok Wati..” balas Bang Idrus spontan.

“Duu... ngareppp... bebesanan aje lebih pantes..,”cletuk Udin.

“Tembako dua kati bawaannye. Dikasih Mak Atun ame sirihnye. Kalo ude ngerasa kerogoh atinye. Kok cuman mesam-mesem aje di depan orangnye?” cletuk Mpok Wati sambil berpantun, lalu berdiri dan melangkah masuk ke rumahnya.

Bang Idrus berdebar hatinya, sambil celingak celinguk, ngarepin Mpok Wati keluar lagi. Jamal dan Udin nerusin latihan kembangan silat beksinye. Tiba-tiba Kyai Pendi lewat.

“Bang Idrus.. Jamal, Udin buruan ke masjid.. Ngapain di bale Mpok Wati.. kagak ade orangnye.. Kagak baek begitu. Ayo buruan ke masjid,”seru Kyai Pendi.

Ketiganya bergegas mengikuti Bang Pendi melangkah ke Masjid untuk salat Maghrib.. |  

(LONGOK JUGA : Kalo Nyak Jadi Gubernur)

Editor : sem haesy
 
Humaniora
24 Mar 24, 15:58 WIB | Dilihat : 100
Isyarat Bencana Alam
16 Mar 24, 01:40 WIB | Dilihat : 517
Momentum Cinta
12 Mar 24, 01:26 WIB | Dilihat : 526
Shaum Ramadan Kita
09 Mar 24, 04:38 WIB | Dilihat : 445
Pilot dan Co Pilot Tertidur dalam Penerbangan
Selanjutnya
Polhukam
05 Mar 24, 04:23 WIB | Dilihat : 244
Tak Perlu Risau dengan Penggunaan Hak Angket DPR
05 Mar 24, 08:18 WIB | Dilihat : 422
Anak Anak Abah Menghalau AI Generatif
22 Feb 24, 11:50 WIB | Dilihat : 317
Jalan Terjal Perubahan
18 Feb 24, 05:52 WIB | Dilihat : 272
Melayari Dinamika Kebangsaan dan Demokrasi
Selanjutnya